Turkish Airlines ħabbret li qed tippjana li tħallas id-danni lill-passiġġieri kollha fuq l-ajruplan li ġġarraf fl-Ajruport ta’ Schiphol ta’ Amsterdam il-ġimgħa li għaddiet. Sa issa l-linja tal-ajru kienet ħabbret biss pagamenti għal dawk li weġġgħu u l-familji ta’ dawk li mietu fl-inċident.
Turkish Airlines issa qed tgħid li biħsiebha tħallas mill-inqas 5,000 ewro lill-passiġġieri, 10,000 lill-midruba u 50,000 lill-familji ta’ dawk li mietu. Għadd ta’ passiġġieri diġà talbu parir legali u fl-Olanda qed isiru tħejjijiet biex titwaqqaf assoċjazzjoni ta’ vittmi bil-għan li tittieħed azzjoni kollettiva kontra l-linja tal-ajru.