Eurostat: It-turisti lejn l-UE għażlu soġġorni iqsar fl-2009

BRUSSELL – It-turisti qattgħu inqas iljieli fil-pajjiżi tal-Unjoni Ewropea (UE) fl-2009 milli għamlu fl-2008, sinjal tal-kriżi ekonomika, qal l-uffiċċju tal-istatistika tal-UE Eurostat.

Fl-2009, inqatgħu kważi 1.5 biljun lejl f’lukandi u stabbilimenti simili fl-UE, tnaqqis ta’ 5.1 fil-mija meta mqabbel mal-2008, wara tnaqqis annwali ta’ 0.2 fil-mija fl-2008 u żieda ta’ 3.5 fil-mija fl-2007.

Il-Eurostat qal li t-tnaqqis fin-numru ta’ ljieli f’lukandi fl-UE beda f’nofs l-2008 u naqas matul l-2009. In-numru ta’ ljieli f’lukandi naqas b’rata annwali ta’ 8.0 fil-mija minn Jannar sa April 2009, meta mqabbel mal-istess perjodu ta’ is-sena ta’ qabel, ta’ 4.1 fil-mija minn Mejju sa Awwissu u ta’ 3.6 fil-mija minn Settembru sa Diċembru.

Iċ-ċifri uffiċjali wrew li n-numru ta’ ljieli f’lukanda li qattgħu persuni mhux residenti rreġistra tnaqqis akbar ta’ 9.1 fil-mija u mir-residenti f’pajjiżhom stess naqas b’1.6 fil-mija.

Fost is-27 stat membru tal-UE, l-ogħla numri ta’ ljieli li qattgħu f’lukandi fl-2009 ġew irreġistrati fi Spanja, l-Italja, il-Ġermanja, Franza u l-Gran Brittanja. Dawn il-ħames pajjiżi ammontaw għal aktar minn 70 fil-mija tan-numru totali ta’ ljieli f’lukandi fl-UE.

In-numru ta’ ljieli li qattgħu fil-lukandi fl-2009 naqas fil-pajjiżi kollha tal-UE, ħlief fl-Isvezja fejn żdied bi ftit b’0.1 fil-mija. L-akbar tnaqqis kien irreġistrat fil-Latvja u l-Litwanja. It-tnejn raw tnaqqis annwali ta’ aktar minn 20 fil-mija.