Il-forzi tas-sigurtà Eġizzjani nhar is-Sibt nedew kaċċa għall-bniedem għal żewġt irġiel li jemmnu li qed jippjanaw li jniedu attakki ta’ terrur f’siti turistiċi tas-Sinaj. Twaqqfu roadblocks u checkpoints fuq rotot li jwasslu għas-Sinaj u l-forzi tas-sigurtà qed ifittxu trakk żgħir li hu maħsub li qed iġorr ammont kbir ta’ splussivi. Is-suspettati huma maħsuba li daħlu fl-Eġittu mill-fruntiera tan-nofsinhar tiegħu mas-Sudan.
Gruppi affiljati mal-Al Qaida nedew attakki kbar bil-bombi fuq żoni turistiċi fis-Sinaj bejn l-2004 u l-2006. L-attakki terroristiċi f’dak iż-żmien seħħew f’Sharm el-Sheikh, Taba u Dahab u nqatlu mill-inqas 125 persuna fosthom Iżraeljani.
F’dak iż-żmien, il-gvern Eġizzjan tefa’ l-attakki fuq gruppi militanti Iżlamiċi lokali u qal li Al Qaida attivat ċelloli sleeper fl-Eġittu u kien irċieva kooperazzjoni minn Bedouin lokali fis-Sinaj li għenu lit-terroristi biex jevadu l-ostakli u l-punti ta’ kontroll stabbiliti mill-forzi tas-sigurtà Eġizzjani. It-tliet organizzazzjonijiet li l-ewwel ħadu r-responsabbiltà għall-attentati suwiċida kienu l-Al Jamaáh Islamiya al Alamiya (Grupp Iżlamiku Internazzjonali), il-Kataib al Tawhid al Islamiya (Brigati Iżlamiċi tal-Unità ta’ Alla) u l-Brigati Abdullah Azzam.
Ftit jiem ilu, il-mexxej numru tnejn ta’ Al Qaida Ayman al Zawahri sejjaħ għal attakki fuq miri Iżraeljani, Lhud u Amerikani bħala vendetta għall-forzi tal-koalizzjoni li joperaw fl-Iraq u bi tweġiba għal dak li ddeskriva bħala l-olokawst li qed isir minn Iżrael kontra l-Palestinjani fl-Iraq. Gaża.
infolive.tv
