IL-KAIRO, l-Eġittu – Skont il-midja tal-istat, l-Eġittu abbanduna l-pjanijiet biex ibiddel ir-rekwiżiti tal-viża għal turisti individwali, wara li diversi operaturi turistiċi ewlenin ilmentaw li r-restrizzjonijiet il-ġodda se jżommu lill-viżitaturi barranin 'il bogħod.
Reuters tirrapporta li l-gvern tal-Eġittu approva r-restrizzjonijiet tlett ijiem ilu, u qal li ried itejjeb is-sigurtà.
Iżda biddel fehmtu meta uffiċjali wissew li l-bidliet se jagħmlu ħsara lil industrija vitali, li diġà tweġġa’ wara r-rewwixta ta’ din is-sena kontra l-eks president Hosni Mubarak.
Skont Reuters, ir-regoli kienu jġiegħlu lit-turisti individwali jiksbu viżi tad-dħul f'pajjiżhom qabel ma jidħlu fl-Eġittu. Nies biss li jivvjaġġaw ma’ kumpaniji tat-turs approvati kienu jkunu jistgħu jkomplu jiksbu viżi fl-ajruporti Eġizzjani.
“Li toħroġ deċiżjoni bħal din ikollha effetti negattivi severi fuq it-turiżmu li sar ovvju minn reazzjonijiet minn ġewwa u minn barra l-Eġittu u dan wassal biex id-deċiżjoni titħassar kompletament,” kien ikkwotat jgħid il-Ministru tat-Turiżmu Mounir Fakhry Abdel Nour.
Id-dħul mit-turiżmu niżel b'47.5 fil-mija għal $3.6 biljun f'Jannar sa Ġunju ta' din is-sena meta mqabbel ma' $6.9 biljun f'Lulju sa Diċembru 2010, qabel ir-rewwixta.
